Isa 62 | MalMCV | STEP | അവളുടെ കുറ്റവിമുക്തി പ്രഭാതകിരണങ്ങളുടെ പ്രസരിപ്പു‍പോലെയും അവളുടെ രക്ഷ ജ്വലിക്കുന്ന പന്തംപോലെയും ആകുന്നതുവരെ സീയോനുവേണ്ടി ഞാൻ നിശ്ശബ്ദമായിരിക്കുകയില്ല, ജെറുശലേമിനുവേണ്ടി മൗനമായിരിക്കുകയുമില്ല.

Isaiah 62

സീയോന്റെ പുതിയ നാമം

1 അവളുടെ കുറ്റവിമുക്തി പ്രഭാതകിരണങ്ങളുടെ പ്രസരിപ്പു‍പോലെയും
അവളുടെ രക്ഷ ജ്വലിക്കുന്ന പന്തംപോലെയും ആകുന്നതുവരെ
സീയോനുവേണ്ടി ഞാൻ നിശ്ശബ്ദമായിരിക്കുകയില്ല,
ജെറുശലേമിനുവേണ്ടി മൗനമായിരിക്കുകയുമില്ല.
2 രാഷ്ട്രങ്ങൾ നിന്റെ കുറ്റവിമുക്തിയും
എല്ലാ രാജാക്കന്മാരും നിന്റെ മഹത്ത്വവും ദർശിക്കും;
യഹോവയുടെ വായ് കൽപ്പിച്ചുതരുന്ന
ഒരു പുതിയ പേരിനാൽ നീ വിളിക്കപ്പെടും.
3 നീ യഹോവയുടെ കൈയിൽ ഒരു മഹത്ത്വകിരീടമായും
നിന്റെ ദൈവത്തിന്റെ കൈയിൽ രാജകീയ മകുടമായും തീരും.
4 നീ ഇനിയൊരിക്കലും ഉപേക്ഷിക്കപ്പെട്ടവൾ ^{▼▼മൂ.ഭാ. അസൂബാ} എന്നോ
നിന്റെ ദേശം വിജനദേശം ^{▼▼മൂ.ഭാ. ശെമാമാ} എന്നോ വിളിക്കപ്പെടുകയില്ല.
എന്നാൽ നീ ഹെഫ്സീബാ ^{▼▼എന്റെ ആനന്ദമായവൾ എന്നർഥം.} എന്നും
നിന്റെ ദേശം ബെയൂലാ ^{▼▼വിവാഹിത എന്നർഥം.} എന്നും വിളിക്കപ്പെടും;
കാരണം യഹോവ നിന്നിൽ ആനന്ദിക്കുകയും
നിന്റെ ദേശം വിവാഹം ചെയ്യപ്പെട്ടതും ആയിത്തീരും.
5 ഒരു യുവാവു യുവതിയെ വിവാഹംചെയ്യുന്നതുപോലെ
നിന്റെ പുത്രന്മാർ ^{▼▼ചി.കൈ.പ്ര. നിർമാതാക്കൾ} നിന്നെ അവകാശമാക്കും.
മണവാളൻ മണവാട്ടിയിൽ ആനന്ദിക്കുന്നതുപോലെ
നിന്റെ ദൈവം നിന്നിൽ ആനന്ദിക്കും.

6 ജെറുശലേമേ, രാത്രിയും പകലും മൗനമായിരിക്കാത്ത
കാവൽക്കാരെ ഞാൻ നിന്റെ മതിലുകളിന്മേൽ നിരന്തരം വിന്യസിച്ചിരിക്കുന്നു.
യഹോവയെ വിളിച്ചപേക്ഷിക്കുന്നവരേ,
നിങ്ങൾ വിശ്രമിക്കാനേ പാടില്ല.
7 അവിടന്ന് ജെറുശലേമിനെ സ്ഥാപിക്കുകയും അവളെ ഭൂമിയിൽ ഒരു പ്രശംസാവിഷയമാക്കുകയും ചെയ്യുന്നതുവരെ
അവിടത്തേക്ക് സ്വസ്ഥത നൽകരുത്.

8 യഹോവ തന്റെ വലംകരത്തെയും ബലമുള്ള ഭുജത്തെയും ചൊല്ലി
ഇപ്രകാരം ശപഥംചെയ്തിരിക്കുന്നു:
“തീർച്ചയായും ഞാൻ നിന്റെ ധാന്യം
നിന്റെ ശത്രുവിനു ഭക്ഷണമായി കൊടുക്കുകയില്ല,
നിന്റെ അധ്വാനഫലമായ പുതുവീഞ്ഞ്
വിദേശികൾ ഇനിയൊരിക്കലും കുടിക്കുകയില്ല;
9 എന്നാൽ അതിന്റെ വിളവെടുക്കുന്നവർ അതു ഭക്ഷിച്ച്
യഹോവയെ സ്തുതിക്കും,
അതു ശേഖരിക്കുന്നവർ എന്റെ വിശുദ്ധമന്ദിരത്തിന്റെ
അങ്കണത്തിൽവെച്ച് അതു പാനംചെയ്യും.”

10 കടന്നുപോകുക, കവാടങ്ങളിലൂടെ കടന്നുപോകുക!
ഈ ജനത്തിനു വഴിയൊരുക്കുക.
നിരത്തുക, രാജവീഥി നിരത്തുക!
കല്ലുകൾ പെറുക്കിക്കളയുക.
രാഷ്ട്രങ്ങൾക്ക് ഒരു കൊടി ഉയർത്തുക.

11 ഇതാ, ഭൂമിയുടെ അറുതികളിലെല്ലാം
യഹോവ വിളംബരംചെയ്തിരിക്കുന്നു:
“ ‘ഇതാ, നിന്റെ രക്ഷ വരുന്നു!
ഇതാ, പ്രതിഫലം അവിടത്തെ പക്കലും
പാരിതോഷികം അവിടത്തോടൊപ്പവുമുണ്ട്,’
എന്നു സീയോൻപുത്രിയോടു പറയുക.”
12 അവർ വിശുദ്ധജനം എന്നു വിളിക്കപ്പെടും,
യഹോവയാൽ വീണ്ടെടുക്കപ്പെട്ടവർ എന്നുതന്നെ;
അന്വേഷിച്ചു കണ്ടെത്തപ്പെട്ടവൾ എന്നും
ഒരിക്കലും ഉപേക്ഷിക്കപ്പെടാത്ത നഗരം എന്നും വിളിക്കപ്പെടും.